Psa 16 | KYC | STEP | Anatumi namba kyawa lete nyere lao suu pyapala epelyo dokona embame kyawa yaki nyii napipi.

Psalms 16

Mende Pira Doko Soo Pakana Palyapala Ateŋa Lenge

1 Anatumi namba kyawa lete nyere lao suu pyapala epelyo dokona embame kyawa yaki nyii napipi.
2 Nambame Kamongo lamaiyuo, Emba nambana Kamongo.
Nambana bange peparae keyange silyamo dupwa emba keta iki epenge lao karo.

3 Kamongona yulu yaki nyii nao pyakamingi wambu dupwa ama keyange wakasa.
Namba nakama pipya karo dokopa rae wakasa mailyu.

4 Nakama lapo anatu wakale lakando pelyaminyi dokome
nakama range keta randa malu sukusa nyilyaminyi.
Nakamana mena pyao kiso maingi dokonape namba opetae pii naro.
Nakamana anatu dupwa namba lakanda naroko.

5 Emba iki nambana Kamongo ingyuo karene. Mendale daa.
Embame namba yano pipyamo dupwa joo karene.
Namba rengyana nyera dupwa embame minyaro karene.
6 Embame bange elyape wakasa dupwa namba mee jiinyi dupwa
ama keyange wakasa ingilyamo.

7 Kamongo dokome namba kata lasaka pilyamo dokona lao baa lakandelyo.
Kukwa dokopa doko kyaiŋi lao repe repe pii ingyuo langilyamo.
8 Yuu peparae Kamongo doko namba role pyao karapyamo doko soo karo.
Baa repeta karamo dokona namba walu lao kara naro.

9 Dopa pipyamo dokome namba rae maingi rengepe mona pyakalyuo pingi rengepe palyuo simbwalyamo.
Namba embena kame dokona epo mona kare kare karo.
10 Rengedoko embame namba kumunginya porai renge doko neta nembo kyawa minyilini.
Embame mendali mona retenge doko wambu kumasi palenge dokona nemba nangepya.

11 Embame kata pao lete pandana penge doko namba lasaka piri.
Emba yuu peparae namba repeta karene dokome rae mainyi nembapyasa
mona pyakalyuo pyao karalu kararo ingilyamo.